गुहागर, ता. 13 : काळ आला होता, मात्र वेळ आली नव्हती, याची प्रचिती दाभोळ फेरीबोट याठिकाणी आली आहे. दाभोळहून धोपावेला जाणाऱ्या फेरीबोटमध्ये ही धक्कादायक घटना घडली आहे. दाभोळवरून धोपावेला जाणाऱ्या पावणे चारच्या फेरीबोटमध्ये सरस्वती सकपाल (५५ ) फेरीबोटमधून उतरत असताना फेरीबोटचा लोखंडी फाळका महिलेच्या पायावर गेल्यामुळे पायाला गंभीर दुखापत झाली आहे. Woman seriously injured by ferry boat
याबाबत सविस्तर वृत्त असं आहे की, दाभोळवरून पावणे चार वाजता सुटलेली फेरीबोट धोपावेला गेली असता धोपावे येथे येताच अनेकजण उतरण्याची घाई करतात मात्र हीच घाई या महिलेच्या जीवावर बेतली असती. एसटी पकडण्यासाठी या महिलेने घाई करुन धोपावे जेटीला फाळका लागण्यापूर्वीच फेरीबोटीतून उडी मारली. मात्र मागून येणाऱ्या फाळक्यात या महिलेचा पाय अडकला आरडाओरड करताच मोटरमननं फेरीबोट मागं घेऊन थांबवली. त्यानंतर फेरीबोटवर असणाऱ्या नागरिकांच्या मदतीनं महिलेला बाहेर काढण्यात यश आलं. या दुर्घटनेत महिलेचा जीव वाचला आहे, मात्र महिलेच्या पायाला गंभीर दुखापत झाली आहे. या घटनेमुळे धोपावे फेरीबोटवर मोठा गोंधळ उडाला. सदर महिलेला दाभोळमध्ये प्राथमिक उपचार करून पुढील उपचारासाठी सावर्डे डेरवनला हलवण्यात आले आहे. Woman seriously injured by ferry boat
