पेवे सरपंच व ग्रामसेवकावर कडक कारवाई करा

ग्रामस्थांची मागणी, खोटी ग्रामसभा दाखवून फसवणूक केली

गुहागर, ता. 04 : तालुक्यातील पेवे ग्रामपंचायतीचे सरपंच आणि ग्रामसेवकांनी खोटी ग्रामसभा दाखवून शासनाची फसवणूक केली आहे. सरपंच आणि ग्रामसेवकांच्या चुकीच्या वागण्यामुळे सात मासिक सभा तहकुब झाल्या आहेत. त्यामुळे गटविकास अधिकाऱ्यांनी कारवाई करावी. असे पत्र पेवेचे माजी सरपंच, तंटामुक्तीचे अध्यक्ष, पेवे सोसायटीचे संचालक आणि माजी ग्रामपंचायत सदस्य यांनी गटविकास अधिकारी यांना दिले आहे. Fraud by showing Gram Sabha

गुहागर तालुक्यातील पेवे खामशेत मादाली पुल ते कारुळ मार्गे खरेकोंड असा सुमारे 7 किमिचा रस्ता 2020 मध्ये मंजूर झाला होता. हा मार्ग 7 फुट रुंदीचा असल्याने 30 फुट रुंदीसाठी रस्त्याच्या दुतर्फा असलेल्या जमीन मालकांकडून संमतीपत्र घेणे आवश्यक होते. मात्र पेवेच्या सरपंच सौ. भारती सावरटकर आणि ग्रामसेवक डोलारी यांनी 8 जुलै 2021 ला खोटी ग्रामसभा झाल्याचे दाखवले. या ग्रामसभेत सदर रस्त्यासाठी जमीन मालकांच्या संमंतीची गरज नाही. खासगी जमीन जात नाही. असे खोटे ठराव केले. तसे पत्र खासदार सुनिल तटकरे व प्रधानमंत्री ग्राम सडक योजनेचे कार्यकारी अभियंता रत्नागिरी यांना पाठवले. त्यानंतर झालेल्या ग्रामसभेमध्ये रस्त्याच्या दुतर्फा असलेल्या ग्रामस्थांनी जमीन देण्यास नकार दिला.  परिणामी सात किलोमिटरचा रस्ताच अडचणीत सापडला आहे. Fraud by showing Gram Sabha

हा सर्व प्रकार पेवेतील मुबीन पेवेकर यांनी माहितीच्या अधिकारात पाठवलेल्या पत्रावरुन उघड झाला. सरपंच आणि ग्रामसेवकांनी गावाची फसवणूक केल्याने पेवेचे माजी सरपंच निसार सरगुरो, तंटामुक्ती समितीचे अध्यक्ष सुभाष जाधव, माजी ग्रामपंचायत सदस्य दिनकर पारधी आणि मुबीन पेवेकर व पेवे सोसायटीचे संचालक सुरज हरचिलकर यांनी गटविकास अधिकारी, पंचायत समिती, गुहागर यांना निवेदन दिले आहे. या निवेदनामध्ये  खोट्या ग्रामसभेबाबतच्या तक्रारीबरोबर सरपंच ग्रामसभेतील व मासिक सभेतील ठरावांवर सही करत नसल्याने अनेक कामे रद्द झाली आहेत. गेल्या सात मासिक सभा तहकुब झाल्या आहेत. त्यामुळे गावाचे नुकसान होत आहे. या सर्व घटनांची चौकशी करुन सरपंच व ग्रामसेवकावर कडक कारवाई करावी. अशी मागणी करण्यात आली आहे. Fraud by showing Gram Sabha