दि. २६ व २७ फेब्रुवारी रोजी सुंकाई मातेचा मुख्य होलिकोत्सव
गुहागर, ता. 25 : कोकणातील पारंपरिक शिमगोत्सवाच्या पार्श्वभूमीवर गुहागर तालुक्यातील अडूर ग्रामदेवता श्री सुंकाई देवीचा वार्षिक होलिकोत्सव दि. २२ फेब्रुवारीपासून मोठ्या उत्साहात सुरू झाला आहे. या उत्सवातील सर्वात आकर्षणाचा आणि थरारक भाग म्हणजे पेटत्या होमातून धावत भक्तांचा पाठलाग करणारा संकासुर. ही आगळीवेगळी परंपरा पाहण्यासाठी दरवर्षी जिल्हा तसेच परजिल्ह्यातून भाविक मोठ्या संख्येने उपस्थित राहतात. Holi festival of Adur Sunkai Devi
ग्रामदेवतेची पहिली होळी फाल्गुन पंचमीला प्रज्वलित होते. त्यादिवशी देवीच्या खेळ्यांची भोवनी चतु:सीमेतील कोंडकारूळ, बोऱ्या, बुधल, पालशेत व नागझरी या गावांत पार पडते. निवडक भोवनीचे खेळे झाल्यानंतर फाल्गुन दशमी (दि. २६ फेब्रुवारी) रोजी पाचवी होळी तर फाल्गुन एकादशी (दि. २७ फेब्रुवारी) रोजी सहावी होळी साजरी केली जाणार आहे. या दोन्ही दिवशी नवीन व जुनी गावकी नमन मंडळांच्या सादरीकरणासह सायंकाळी भाटी मैदानावर पेटत्या होमातून धावणाऱ्या संकासुराचा थरार अनुभवायला मिळणार आहे. फाल्गुन त्रयोदशीला भोवनीच्या खेळ्यांची सांगता होईल, तर फाल्गुन चतुर्दशीला होळी सणाच्या दिवशी ग्रामदेवता सुंकाई देवीची रूपे लावण्याचा कार्यक्रम पार पडेल. Holi festival of Adur Sunkai Devi
फाल्गुन पौर्णिमा, म्हणजेच धुलीवंदन दिवशी मुख्य धार्मिक कार्यक्रम होणार आहे. सकाळी ग्रामदेवता सुंकाई मातेची पालखी मंदिरातून सहाणेकडे आणण्यात येईल. वारकरी भजनाच्या गजरात माडहोळी घेऊन देवीच्या होमाभोवती पाच प्रदक्षिणा घालून होमाला अग्नी दिला जाईल. त्यानंतर सुंकाई देवी व पावणाई देवी यांच्या होमाभोवती वाजत–गाजत मिरवणूक काढून पालखी सहाणेमध्ये स्थानबद्ध केली जाईल आणि महाआरती होईल. याच दिवशी दुपारी अडूर, कारूळ, बोऱ्या व बुधल या गावांच्या चतु:सीमेची बैठक आयोजित करून ग्रामदेवतेची पालखी घरोघरी भोवणीसाठी नेण्याचे नियोजन केले जाईल. रात्री १० वाजता सुंकाई देवी ग्रामस्थ मंडळ, अडूर यांच्या वतीने बहुरंगी नमन कलेचे सादरीकरण होणार आहे. Holi festival of Adur Sunkai Devi
धुलीवंदनच्या दुसऱ्या दिवशी धुळवट साजरी करण्यात येईल. यावेळी ग्रामदेवता सुंकाईसह विविध देवस्थानांना मानकऱ्यांच्या हस्ते श्रीफळ अर्पण करून प्रसाद व खजूर वाटप केले जाईल. त्यानंतर ग्रामदेवतेची पालखी मराठा समाज व श्री पड्याळ देवाच्या मानाच्या स्थानी नेऊन गाऱ्हाणे घालण्यात येईल. पुढील दिवसांपासून पालखी घरोघरी भोवणीसाठी नेली जाईल. Holi festival of Adur Sunkai Devi
