नाताळचा उत्सव श्रमदानातून साजरा

वाडदईकरांची विवेकानंदालयात स्वच्छता

गुहागर, ता. 03 : तालुक्यातील वाडदई येथील ग्रामस्थांनी साथ साथ चॅरीटेबल ट्रस्टच्या विवेकानंदालय ग्रामविकास प्रकल्पात स्वच्छता मोहिम राबवली. स्वातंत्र्याच्या अमृत महोत्सवी वर्षात एका सेवा प्रकल्पावर स्वच्छ भारत अभियान राबविण्याचा उपक्रम केल्याचे सुभाष कांबळे यांनी सांगितले. या अभियानात वाडदईमधील 52 ग्रामस्थ सहभागी झाले होते. Cleanliness in Vivekanandalaya

वाडदईतील सामाजिक काम करणारे विनायक कांबळे आणि सुभाष कांबळे यांनी स्वातंत्र्याच्या अमृतमहोत्सवी वर्षात स्वच्छ भारत अभियानांतर्गत एक दिवस श्रमदानातून स्वच्छता करण्याचा उपक्रम वाडदईतील ग्रामस्थांना सांगितला. ग्रामस्थांनीही या उपक्रमाचे स्वागत केले. त्यानंतर सुभाष कांबळे आणि विनायक कांबळे यांनी साथ साथ चॅरीटेबल ट्रस्टचे विश्र्वस्त शरद जोशी यांच्यासोबत उपक्रमाविषयी चर्चा केली. त्यावेळी शरद जोशी यांनी विवेकानंदालय या ग्रामविकास प्रकल्पाद्वारे पंचक्रोशीतील ग्रामस्थांसाठी विविध उपक्रम सातत्याने राबविले जातात. त्याचबरोबर विवेकानंदालयच्या परिसरात विविध प्रकारची शेकडो झाडे लावून माळरानावर हिरवळ उभी करण्याचे कामही आपण करत आहोत. या प्रकल्पात येवून श्रमदान करावे. त्यासाठी आवश्यक ते सहकार्य आम्ही करु. असे सांगत वाडदईकरांना उपक्रम स्थानावर निमंत्रण दिले. Cleanliness in Vivekanandalaya

दिवस ठरला. विवेकानंदालय ग्रामविकास प्रकल्पाचे कार्यकर्ते प्रकाश देवळे यांनी कामाचे नियोजन केले. त्याप्रमाणे  18 महिला, 22 पुरुष, 12 शाळकरी मुले असे 52 ग्रामस्थ प्रकल्पावर आले. 97 गुंठे परिसरातील वेगवेगळ्या कामासाठी वेगवेगळ्या टीम तयार करण्यात आल्या. पावसाळ्यात वाढलेले गवत काढणे, 125 झाडांना पाणी घालण्यासाठी अळ्या तयार करणे, कातळावरील कचवं (छोटी काटेरी झाडे) उपटणे, इतस्तत: पडलेला जांभा चिरा रचनेत लावणे, चिऱ्यांमध्ये साप, विंचू राहू नयेत  म्हणून फवारणी करणे. अशी कामे श्रमदानातून करण्यात आली. त्यानंतर परिसरातील राम मंदिरात सर्वांनी वनभोजनाचा आनंद लुटला. ही व्यवस्था साथ साथ चॅरीटेबल ट्रस्टद्वारे करण्यात आली होती. Cleanliness in Vivekanandalaya

श्रमदानाचे वेळी वेळणेश्र्वर वाडदई ग्रुप ग्रामपंचायतीचे सरपंच चैतन्य धोपावकर यांनीही काही काळ उपस्थित राहुन श्रमदानाचा आनंद लुटला. वाडदईकर नेहमीच आगळेवेगळे उपक्रम करतात. सदैव सहकार्यासाठी तयार असतात. असे सांगून त्यांनी वाडदईकरांचे कौतुक केले. Cleanliness in Vivekanandalaya

साथ साथ चॅरीटेबल ट्रस्टचे विश्र्वस्त शरद जोशी म्हणाले की, आपल्या परंपरेत नसलेला नाताळ आणि नववर्ष स्वागतोत्सव अन्यत्र कशा पध्दतीने साजरा केला जातो ते आपण पहातो. मात्र कोणत्याही उत्सवाला, सामुहिक शक्ती चांगली दिशा देऊ शकते. एकाचवेळी इतक्या ग्रामस्थांनी केलेल्या श्रमदानातून एक एकराचा परिसर काही तासांत आपण स्वच्छ करु शकतो. हे आज वाडदईकरांनी दाखवून दिले आहे. प्रकल्प कार्यकर्ते प्रकाश देवळे यांनी  वाडदईतील ग्रामस्थांचे तसेच सुभाष कांबळे आणि विनायक कांबळे यांचे आभार मानले. Cleanliness in Vivekanandalaya