गणेशोत्सवात शृंगारतळीत वाहतूक व्यवस्था सुरळीत

गुहागर पोलिसांची कौतुकास्पद कामगिरी

गुहागर, ता. 25 :  गणेशोत्सवा दरम्यान गुहागर तालुक्यातील सतत वर्दळीची असलेली शृंगारतळी बाजारपेठमध्ये वाहतूक व्यवस्था सुरळीत राहण्यासाठी पोलिसांनी कौतुकास्पद कामगिरी केली आहे. चाकरमानी व स्थानिकांचा अडथळे विना प्रवास व्हावा, यासाठी एकाच वेळी तीन ते चार पोलीस कर्मचारी बाजारपेठेत ग्रस्त घालत होते. Traffic is smooth during Ganeshotsav

यावर्षी एसटी बससह चाकरमनी आपली वाहने घेऊन आपल्या गावी गणेशोत्सवासाठी हजारोंच्या संख्येने आलेले आहेत. शृंगारतळी ही तालुक्याची मुख्य बाजारपेठ असल्याने सर्व ग्राहक खरेदीसाठी येत असतात. लाखो रुपयांची उलाढाल याठिकाणी होत असते. गणपती काळात देखील हजारो ग्राहक वाहने घेऊन याठिकाणी खरेदीसाठी येत असतात. गुहागर – विजापूर महामार्गाचे काम बाजारपेठेतून पूर्ण झाले असले तरी दुचाकी आणि चारचाकी वाहनांमुळे पार्किंग करणे अडचणीचे होऊन जाते. बाजारपेठ मधील रस्त्यावर वाहने लावण्यास जागाच शिल्लक नसल्याने चुकून वाहन चालकाने वाहने उभी केल्यास मोठी वाहतूक कोंडी निर्माण होते. अशावेळी वादाचे प्रसंग घडतात. जागेची अडचण असताना देखील सहाय्यक पोलिस उपनिरीक्षक प्रमोद मोहिते हे अन्य कर्मचारी यांच्या सहकार्याने नम्रपणे नागरिकांशी संवाद साधत आहेत. स्थानिक व मुंबईकर नागरिक पोलिसांच्या विनंतीला मान देत आहेत. Traffic is smooth during Ganeshotsav

सायंकाळी बाजारपेठेत गर्दी होत असते. त्याचप्रमाणे मुंबईला जाणाऱ्या वाहनांची सुद्धा गर्दी होत असते. परंतु येथील पोलिसांच्या कार्यक्षमतेमुळे सर्व वाहने सुरळीतपणे मार्गस्थ होत आहेत. बाजारपेठेतील शृंगारतळीचा राजा पाहण्यासाठी भाविकांची प्रचंड गर्दी होत आहे. याही भाविकांच्या गर्दीला नियंत्रण करण्याचे काम पोलिसांना करावे लागत आहे. आज मितीस कोणताही अनुचित प्रकार बाजारपेठेत घडलेला नाही. गुहागर पोलीस स्थानकाचे पोलीस निरीक्षक सचिन सावंत यांच्या मार्गदर्शनाखाली पोलीस उपनिरीक्षक श्री. पवनकुमार कांबळे व अन्य पोलीस कर्मचारी दिवस – रात्र वाहतूक सुरळीत करण्यासाठी मेहनत घेत आहेत. Traffic is smooth during Ganeshotsav