गुहागर, ता. 04 : गुहागर परिसराला पाणीपुरवठा करणारे मोडकाआगर धरण आटले असून त्याची पाणीपातळी कमालीची घटली आहे. पावसाळा सुरू होण्याआधीच्या या दिवसांत वाढत्या उन्हामुळे आणि बाष्पीभवनामुळे धरणातील पाणीसाठा तळाला गेला आहे. गेल्या वर्षी मे महिन्याच्या मध्यावर पावसाने सुरुवात केली होती, में महिन्याच्या अखेरीस सदरचे धरण पूर्ण भरले होते. परंतु यावर्षी जून महिन्याचा पहिला आठवडा होत आला तरी अजूनही पावसाने दमदार सुरुवात न केल्यामुळे धरणातील पाण्याची पातळी घटत चालली आहे. गेल्या वर्षी सदरचे धरण पूर्ण क्षमतेने भरले होते. मात्र, सद्यस्थितीत तीव्र उन्हाळ्यामुळे हा साठा अत्यंत कमी झालेल्या दिसून येत आहे. Decline in water level at Modkaaagar Dam
या धरणावर गुहागर नगरपंचायतीसह असगोली, पाटपन्हाळे, पालशेत, वरवेली, धोपावे या ग्रामपंचायतींच्या नळपाणी योजना अवलंबून आहेत. तसेच या परिसरामध्ये या धरणाच्या पाण्यावर उन्हाळी शेती सुद्धा करण्याचे प्रमाण वाढत आहे. या धरणामुळे परिसरातील असंख्य शेतकरी व बागायतदार यांच्या विहिरींना पाण्याचा मुबलक साठा होत असतो. परंतु धरण आटल्यामुळे या परिसरामध्ये तीव्र पाणीटंचाई होण्याची भीती निर्माण झाली आहे. धरणातील गाळ काढणे आणि पावसाचे वाहून जाणारे पाणी अडवण्यासाठी उपाययोजना करण्याची मागणी स्थानिक पातळीवरून जोर धरत आहे. Decline in water level at Modkaaagar Dam
