गुहागर, ता. 11 : तालुक्यातील आरेगांव येथील केतन भोसले या तरुणाचा पाण्यात बुडून दुर्दैवी मृत्यू झाला आहे. ग्रामस्थांकडून मिळालेल्या माहितीनुसार केतन रविवारी, ता. 11 जुलैला दुपारी 1.30 च्या दरम्यान अंजनवेल परिसरात मित्रांसोबत पोहण्यासाठी गेला होता. या दुर्दैवी घटनेमुळे आरेगांववर शोककळा पसरली आहे. केतनच्या पश्चात भाऊ, पत्नी आणि मुले असा परिवार आहे.
अंजनवेल गावात कातळवाडी ते पेठ अंजनवेल असा अंतर्गत रस्त्या आहे. या रस्त्याच्या बाजुने वाहणाऱ्या नदीवर अनेक ठिकाणी पक्के बंधारे बांधण्यात आले आहेत. पावसाळ्यात गुहागर तालुक्यातील कॉलेज विद्यार्थी, पुरुष, महिला येथे पोहोण्याचा आनंद लुटण्यासाठी येतात. आज रविवार असल्याने या रस्त्यावरील अनेक बंधाऱ्यांवर पोहोण्यासाठी गर्दी झाली होती. केतन भोसलेही आपल्या मित्रांसोबत या नदीवरील एका बंधाऱ्यावर 11 जुलैला दुपारी 1.30 च्या दरम्यान पोहायला गेला होता. पोहताना अचानक केतन दिसेनासा झाला. केतनच्या मित्रांनी बाजारपेठत पुलापर्यंत केतनचा शोध घेतला. त्यानंतर आरेगावातील ग्रामस्थांनी स्थानिक ग्रामस्थांच्या मदतीने शोध घेण्यास सुरवात केली. सायंकाळी 6.00 च्या दरम्यान केतनचा मृतदेह याच नदीत सापडला. पस्तीशीच्या दरम्यान वय असलेल्या केतनच्या या अपघाती मृत्यूमुळे आरेगावात शोककळा पसरली आहे.
आरेगावातील तरुणाचा पाण्यात बुडून मृत्यू
A young man from Aregaon drowned
