गुहागर, ता. 11 : गेल्या दोन वर्षांमध्ये शहरातील इतर बँकांच्या तुलनेत विद्यार्थ्यांना शैक्षणिक कर्ज, घर दुरुस्ती कर्ज तसेच विविध शासकीय व बँक योजनांचा लाभ मिळवून देण्यासाठी कॅनरा बँकेच्या कर्मचाऱ्यांनी विशेष परिश्रम घेतले. ग्राहकांना अधिकाधिक सुविधा उपलब्ध करून देण्यासाठी त्यांनी अनेकदा आपल्या निश्चित कामकाजाच्या वेळेपेक्षा अधिक वेळ काम करत सेवा दिली. विशेष म्हणजे, बहुतांश कर्मचारी स्थानिक नसतानाही त्यांनी स्थानिक नागरिकांच्या गरजा समजून घेत त्यांना सर्वोत्तम सेवा देण्याचे कार्य केले. या उल्लेखनीय कार्याची दखल घेत गुहागर जिमखाना वतीने बँक व्यवस्थापक श्री. आशुतोष नरवरिया तसेच श्री. विनायक शिमगे, श्री. सुहास करजकर आणि श्री. गणेश जाधव यांचा सन्मान करण्यात आला. Guhagar Gymkhana honours Canara Bank employees
यावेळी जिमखाना अध्यक्ष श्री. निलेश म. मोरे, श्री. संगम मोरे, श्री. राकेश साखरकर आणि श्री. राजेंद्र बागकर उपस्थित होते. या उपक्रमामुळे बँक कर्मचारी व ग्राहक यांच्यातील विश्वासाचे नाते अधिक दृढ होण्यास मदत होणार असल्याची भावना उपस्थितांनी व्यक्त केली. Guhagar Gymkhana honours Canara Bank employees
