जिल्हाधिकारी मनुज जिंदल यांचे आदेश
रत्नागिरी, ता. 14 : सर्वोच्च न्यायालयाच्या आदेशांनुसार ‘घनकचरा व्यवस्थापन नियम, २०२६’ ची जिल्ह्यात प्रभावी अंमलबजावणी करण्यासाठी जिल्हाधिकारी मनुज जिंदल यांनी जिल्हास्तरीय “विशेष कक्ष” स्थापन केला आहे. हा कक्ष तात्काळ प्रभावाने कार्यरत झाला असून, कचरा व्यवस्थापनात कसूर करणाऱ्यांवर आता या विशेष यंत्रणेची करडी नजर असणार आहे. ‘Special room’ for solid waste management
जिल्हाधिकाऱ्यांच्या अध्यक्षतेखाली समिती या नवनियुक्त विशेष कक्षाचे अध्यक्ष जिल्हाधिकारी असणार आहेत. सदस्य: मुख्य कार्यकारी अधिकारी (जिल्हा परिषद), पोलीस अधीक्षक व संबंधित विभागांचे प्रमुख. सदस्य सचिव: उपप्रादेशिक अधिकारी, महाराष्ट्र प्रदूषण नियंत्रण मंडळ. जिल्हाधिकारी श्री जिंदल यांनी स्पष्ट केले की, हा विशेष कक्ष केवळ कागदोपत्री नसून तो प्रत्यक्ष क्षेत्रीय पातळीवर काम करेल. शहरी आणि ग्रामीण अशा दोन्ही स्तरांवर कचरा संकलन, वाहतूक आणि प्रक्रिया यावर देखरेख ठेवण्याची जबाबदारी या कक्षाची असेल. ‘Special room’ for solid waste management
विशेष कक्षाची प्रमुख कार्ये
जिओ टॅगिंगद्वारे देखरेख: अधिकृत आणि अनधिकृत डम्पिंग साईट्सची ओळख पटवून तेथील तपासणी अहवाल ‘जिओ टॅग’ केलेल्या छायाचित्रांसह सादर करणे. प्रदूषणावर प्रतिबंध: उघड्यावर कचरा टाकणे किंवा तो जाळणे यांसारख्या पर्यावरणास घातक कृतींवर बंदी आणून कारवाईचा आढावा घेणे. वैज्ञानिक विल्हेवाट: कचऱ्याचे संकलन आणि त्याची शास्त्रोक्त पद्धतीने विल्हेवाट लावली जाते की नाही, याची खातरजमा करणे. जनजागृती: कचरा व्यवस्थापनाबाबत विशेष मोहिमा राबवणे आणि राज्य शासनाला वेळोवेळी अनुपालन अहवाल सादर करणे.
”सर्वोच्च न्यायालयाच्या निर्देशांचे पालन करणे अनिवार्य आहे. जिल्ह्यातील सर्व संबंधित विभाग आणि प्राधिकरणांनी या विशेष कक्षाला पूर्ण सहकार्य करावे, जेणेकरून रत्नागिरी जिल्हा घनकचरा व्यवस्थापनात आदर्श ठरेल.” असे जिल्हाधिकारी, रत्नागिरी यांनी सांगितले. या निर्णयामुळे जिल्ह्यातील अनधिकृत कचरा डेपो आणि प्रदूषण करणाऱ्या घटकांवर चाप बसणार असून स्वच्छ रत्नागिरी मोहिमेला बळकटी मिळणार आहे. ‘Special room’ for solid waste management
