गुहागर : गुहागर तालुक्यातील पाटपन्हाळे एज्युकेशन सोसायटी संचलित न्यू इंग्लिश स्कूल व कनिष्ठ महाविद्यालय पाटपन्हाळे या विद्यालय नुकताच कौमी एकता सप्ताह कार्यक्रम मुख्याध्यापक व मार्गदर्शक श्री. एम. ए.थरकार यांच्या अध्यक्षतेत संपन्न झाला.
एकता सप्ताह कार्यक्रमानिमित्त विद्यार्थ्यांनी विविध स्त्री वेशभूषा सादर करून एकता व समता या मुल्यांचा संदेश दिला.
कौमी एकता सप्ताह कार्यक्रमाचे प्रास्ताविक प्रा. सौ. मनिषा जाधव यांनी केले. राष्ट्रगीत व देशभक्तीपर सामूहिक गीत विद्यार्थ्यांनी सादर करून राष्ट्रप्रेम व देशभक्ती मूल्यांचे महत्व कार्यक्रमातून सांगितले. भारतमाता, महाराणी येसूबाई, जिजामाता, ताराबाई, गुजराती स्त्री, कोळी स्त्री भगिनी, महाराष्ट्रीयन महिला अशा वेशभूषा सादर करून वेशभूषा सादर करण्याचा हेतू मनोगतातून व्यक्त करून एकता व समता ही मूल्ये देशात जोपासली जात आहेत हा संदेश दिला.
प्रा. दिनेश पवार व कलाशिक्षक सुनील मेटकरी यांनी कौमी एकता सप्ताह कार्यक्रमाचा उद्देश, एकता – समता व बंधूता ही जोपासली जाणारी मूल्ये, भारतातील संस्कृती, विविधतेतून एकोपा आदी विषयांनुसार मार्गदर्शन केले. कार्यक्रमाचे अध्यक्ष व मुख्याध्यापक श्री.एम. ए. थरकार यांनी विविध वेशभूषा सादर केलेल्या विद्यार्थिनींचे अभिनंदन करून कौमी एकता सप्ताह कार्यक्रमाचा हेतू, राष्ट्रीय एकता, विविधतेतून जपली जाणारी एकता – बंधुता – समता व न्याय ही मूल्ये, विविध कार्यक्रम उपक्रमातून एकता व समता या मूल्यांची शिकवण, देशाला लाभलेला इतिहास आदी विषयांबाबत मार्गदर्शन केले.
सदर कार्यक्रमासाठी कनिष्ठ महाविद्यालयीन प्रमुख श्री. व्ही.डी. पाटील , जी. डी. नेरले, सांस्कृतिक विभाग प्रमुख व ज्येष्ठ शिक्षिका सौ.एस.एस. चव्हाण , प्रा. श्री. एस.आर.पवार, शिक्षक एस.वाय. भिडे, एस. एम. आंबेकर, सौ. एम. पी. वैद्य आदी शिक्षकवृंद उपस्थित होते. कार्यक्रमाचे सूत्रसंचालन एस. वाय. भिडे यांनी तर प्रा.एस.आर. पवार यांनी उपस्थित शिक्षकवृंद व विद्यार्थ्यांच्या सहकार्याबद्दल आभार मानून कार्यक्रमाचा समारोप केला.
