मुलीसह एकाचा जागीच मृत्यू, चार तरुणींसह एक प्रौढा जखमी
गुहागर, ता. 28 : तालुक्यातील पाचेरी आगर येथे गणेश विसर्जन मिरवणुकीला गालबोट लागले. गणेशमुर्ती असलेल्या वाहनाचे ब्रेक फेल होवून वाहन मिरवणुकीत घुसले. या अपघातात 17 वर्षाच्या मुलीसह 1 प्रौढ मृत्युमुखी पडला असून 5 जण जखमी झाले आहेत. जखमींपैकी दोघांना अधिक उपचारासाठी जिल्हा रुग्णालयात पाठवले आहे. तर तिघांना प्राथमिक उपचार करुन घरी पाठविण्यात आले. या दुर्घटनेमुळे पाचेरीआगर गावावर शोककळा पसरली आहे. Accident in Ganesh immersion procession
आज अनंत चतुदर्शी असल्याने गावागावात गणेश विसर्जनाचा सोहळा सायंकाळपासून सुरू झाला. गुहागर तालुक्यातील पाचेरी आगर गावात विविध घरातील गणेश मुर्तींचे सामुहिक विसर्जन केले जाते. सायंकाळी 4 वा. विसर्जन मिरवणुकीला सुरवात झाली. ही मिरवणुक वाजतगाजत विसर्जन घाटाकडे जात होती. सायंकाळी 4.45 च्या दरम्यान मिरवणुकीत गणपती ठेवलेल्या एका टेम्पोचे ब्रेक फेल झाले आणि हा टेम्पो मिरवणुकीत नाचणाऱ्या गणेशभक्तांमध्ये घुसला. त्यामध्ये कोमल भुवड (वय 17, रा. पाचेरीआगर) व दिपक भुवड (वय 48, रा. पाचेरीआगर) हे दोघे टेम्पोखाली चिरडून जागीच मृत्युमुखी पडले. तर दिया रमेश भुवड (वय 16) व तेजल संदिप पाष्टे (वय 20), रिया रामचंद्र वेलोंडे (वय 12), स्नेहल संदिप पाष्टे (वय 23) आणि उषा गुणाजी पाष्टे (वय 56) जखमी झाल्या. सर्वांना आबलोली येथील प्राथमिक आरोग्य केंद्रात दाखल करण्यात आले. त्यापैकी दोघांना रत्नागिरी जिल्हा रुग्णालयात अधिक उपचारासाठी हलविण्यात आले आहे. Accident in Ganesh immersion procession
सदर अपघाताचे वृत्त कळताच गुहागर पोलीस तातडीने घटनास्थळी दाखल झाले. पाठपोठ चिपळुण, गुहागरचे पोलीस उपविभागीय अधिकारी राजेंद्र राजमाने देखील घटनास्थळी पोचले. आबलोली व पाचेरी आगर येथील घटनास्थळी पोलीसांकडून पुढील प्रक्रिया सुरु आहे. Accident in Ganesh immersion procession
