गुहागर : शृंगारतळी येथील प्रसिद्ध मीना बाजार येथे एका दुकानावर ग्रीननेट बांधण्यासाठी चढलेल्या १७ वर्षीय तरुणाला ११ केव्ही विजेचा धक्का लागून त्याचा जागीच मृत्यू झाल्याची घटना सोमवारी सायंकाळी घडली. या प्रकाराने शृंगारतळी बाजारपेठेत एकच खळबळ उडाली आहे.
शृंगारतळी शृंगारी येथील इब्राहिम रहेमतुल्ला तांडेल (वय १७) हा बाजारपेठेतील प्रसिद्ध मीना बाजार याठिकाणी एका दुकानदाराचे ग्रीननेट बांधण्यासाठी गेला होता. सायंकाळी दुकानाच्या वरील बाजूस ग्रीननेट बांधत असताना वरून गेल्या विजेच्या ११ केव्ही वीज वाहिन्यांना इब्राहिमचा स्पर्श झाल्याने तो जागीच मृत्यू पावला. इब्राहिमचे दहावीपर्यंत शिक्षण पाटपन्हाळे इंग्रजी माध्यम हायस्कूल मध्ये झाले. गेल्याच वर्षी त्याने दहावी पूर्ण केली होती. इब्राहिमला एक लहान व एक मोठा असे दोन भाऊ आहेत. त्याच्या अचानक जाण्याने कुटुंबाला मोठा धक्का बसला आहे. त्यांचे वडिल कामानिमित्त बाहेरगावी असतात.
[bsa_pro_ad_space id=3]
