प्रशासनाला दिसूनही दुर्लक्ष
गुहागर : तालुक्यात वाळू उत्खनन करण्यास बंदी असतानाही गुहागर मधील हेदवीसह परचुरी, वडद, भातगाव खाडीपट्ट्यात मोठ्या प्रमाणात वाळूचा उपसा केला जात आहे. महसूल यंत्रणेचा डोळा चुकवत हा उपसा केला उपसा केला जात असल्याचे चित्र भासवले जाते. मात्र, सुरू असलेला वाळू उपसा प्रशासनाला माहीत असूनही त्यावर कारवाई केली जात नसल्याचे समोर आले आहे.
तालुक्यातील हेदवी, नरवण तसेच भातगाव खाडी लागत सध्या मोठ्या प्रमाणात छुप्या पद्धतीने वाळू काढली जात आहे. परिणामी शासनाच्या महसुला सोबत पर्यावरणाची देखील हानी होत आहे. हेदवीच्या किनाऱ्यावर तर वाळूची वाहतूक करण्यासाठी वाळूमाफियांनी संरक्षण भिंत फोडून रस्ता तयार केला आहे. त्यामुळे महसूल प्रशासनाच्या कामगिरीबाबत लोकांची नाराजी व्यक्त होत आहे. कोणत्याही प्रकारची रॉयल्टी भरावी लागत नसल्यामुळे तालुक्यात वाळू माफिया वाळूचा उपसा करत आहेत. सध्या परवानगी नसल्यामुळे वाळूचे दर गगनाला भिडले आहेत. यामुळे अवैधरित्या वाळू विक्री करणाऱ्या व्यावसायिकांची संख्याही वाढली आहे.
भातगाव खाडीत रात्री बरोबरच दिवसाचे वाळू उत्खनन केले जात आहे. भातगाव खाडी तालुक्याच्या ठिकाणाहून लांब असल्याने कारवाईसाठी प्रशासनाचा कोणी येत असेल तर आधीच माहिती वाळू व्यावसायिकांना मिळत असते. त्यानंतर प्रशासनाकडून कारवाईचा फार्स म्हणून कधीतरी वाळूच्या रिकाम्या वाहनांवर कारवाई केली जाते. प्रशासनाच्या ढिलाईमुळे भातगाव खाडीत मोकाटपणे वाळू उपसा सुरू असल्याचे सध्याचे चित्र पहावयास मिळत आहे.