वाशिष्ठी नदीवरील पूलाचा भराव वाहून गेला

मुंबई-गोवा हायवे बंद

चिपळूण : बहादूर शेख नाका येथील वाशिष्ठी नदीवरील (vashisthit river) धोकादायक पुलाचा भराव अखेर आज पहाटे वाहून गेल्याची घटना घडली. अतिवृष्टीमुळे (heavy rain) हा पुल वाहतूकीसाठी बंद करण्यात आला होता. त्यामुळे सावित्री नदीवरील पुल कोसळल्यानंतर झालेल्या सारखी घटना घडली नाही. मुंबई गोवा महामार्गावरील हा ब्रिटीशकालीन महत्त्वाचा पूल होता. आज पहाटे पुलाचा काही भाग वाहून गेला आहे.
गेले दोन दिवस या पुलावरून पाच ते सहा फूट पाणी सतत वेगाने वाहत होते. हा पूल जुन्या काळातील ब्रिटिशकालीन होता. नवीन पुलाचे काम सुरू असल्यामुळे या पुलावरूनच सध्या मुंबई-गोवा (mumbai-goa highway) महामार्गावरील वाहतूक सुरू होती. आज पावसाचा जोर कमी झाल्यानंतर नदीच्या पाण्याचा जोरही कमी झाला. परंतु आज पहाटेच्या सुमाराला या पुलाचा काही भाग वाहून गेला. त्यामुळे पुलाचा भगदाड पडल्यासारखे दृश्य दिसून आले.
राष्ट्रीय महामार्ग विभागाने या पुलाला धोकादायक जाहीर केले होते. पुलाच्या दुरुस्तीसाठी विविध सामाजिक कार्यकर्त्यांकडून तसेच राजकीय नेत्यांकडून सतत पाठपुरावा सुरू होता. मात्र राष्ट्रीय महामार्ग विभागाकडून पुलाच्या दुरूस्तीकडे दुर्लक्ष करण्यात आले. शेजारील नव्या पुलाचे काम सुरू आहे. तेही कासव गतीने सुरू आहे. त्यामुळे मुंबई – गोवा महामार्गावरील वाहतूकीचा मोठा प्रश्न निर्माण झाला आले.