रत्नागिरी : महाराष्ट्र अंधश्रध्दा निर्मूलन समितीच्या वतीने “अंधश्रद्धा निर्मूलन पत्रिका” या मासिकाचे ऑनलाईन प्रकाशन समारंभ रविवार दि.११ जुलै रोजी सकाळी ११ वाजता होणार असल्याची माहिती महा. अंनिस राज्य सरचिटणीस नितीन राऊत व मासिकाचे संपादक प्रा.डॉ.नितीन शिंदे यांनी दिली.
मासिकाचे प्रकाशन ज्येष्ठ विचारवंत व साहित्यिक डॉ.यशवंत मनोहर ( नागपूर) यांच्या हस्ते होणार आहे.कार्यक्रमाच्या अध्यक्षस्थानी राज्य कार्याध्यक्ष अविनाश पाटील हे असणार आहेत. महाराष्ट्र अंधश्रध्दा निर्मूलन समितीचा विचार जनमानसात रुजवण्यासाठी,विवेकी समाज निर्मिती करणे, व्यापक समाज प्रबोधन करणे या मासिकाचा उद्देश आहे,आधुनिक काळात अशा मासिकांची गरज ओळखून समितीने हे पाऊल टाकले आहे. उत्तम जोगदंड हे कार्यकारी संपादक आहेत, तर सह संपादक प्रा.एकनाथ पाटील आहेत. प्रा. डॉ. दीपक बाविस्कर, डॉ. श्यामसुंदर मिरजकर, डॉ. मांतेश हिरेमठ हे संपादक मंडळात आहेत. नामवंत मानस उपचार तज्ज्ञ डॉ. प्रदीप पाटकर,सुप्रसिद्ध लेखिका संध्या नरे -पवार हे सल्लागार आहेत. व्यवस्थापकीय जबाबदारी अवधूत कांबळे सांभाळत आहे. महा अंनिसच्या फेसबुक पेज वर आणि झूम वर हा कार्यक्रम होणार आहे.
कार्यक्रमाचे संयोजन राज्य प्रधानसचिव संजय बनसोडे, सुशीला मुंडे, राज्य सरचिटणीस सुरेखा भापकर , डाॕ. ठकसेन गोराणे व कार्यकारी समिती करीत आहे. सोशल मिडिया जबाबदारी नितीन राऊत व नंदकिशोर तळाशीलकर हे सांभाळणार आहेत. तरी जास्तीत जास्त लोकांनी या आॕनलाईन व फेसबुक लाईव कार्यक्रमाचा लाभ घ्यावा असे आवाहन संघटनेच्या वतीने करण्यात येत आहे.
अंधश्रद्धा निर्मूलन पत्रिका मासिकाचे ११ रोजी प्रकाशन
