नवी दिल्ली : देशातील करोनाच्या वाढत्या प्रादुर्भावाला रोखण्यासाठी सध्या लसीकरणावर मोठया प्रमाणात भर देण्यात येत आहे. त्यासाठी आता देशातील १८ वर्षावरील सर्वांचे लसीकरण करण्यात येत आहे. मात्र आता जर का तुम्ही परदेशी जाणार असाल आणि तुम्ही जर कोव्हिशील्डची लस घेतली असेल तर तुम्हाला अनेक अडचणी येण्याची शक्यता आहे.
There is currently a strong emphasis on vaccination to curb the growing prevalence of coronavirus in the country. For this, now everyone above 18 years of age in the country is being vaccinated. But now if you are going abroad and if you have been vaccinated against covshield, you are likely to face many problems.
भारतात बहुतांश नागरिकांना सीरम इन्स्टिट्यूटची कोव्हिशिल्डची लस दिली जात आहे. मात्र, या लसीमुळे परदेशी जाणाऱ्या प्रवाशांच्या चिंतेत भर पडणार असल्याची चिन्हे आहेत. याचे कारण म्हणजे जागतिक स्तरावरील अनेक देशांमध्ये कोव्हिशील्ड लसीला मान्यता देण्यात आलेली नाही. त्यामुळे त्या देशांमध्ये भारतीय प्रवाशांना प्रवेश मिळू शकणार का, याबाबत प्रश्नचिन्ह निर्माण झाले आहे.
भारतात आताच्या घडीला सीरम इन्स्टिट्यूटची कोव्हिशिल्ड, भारत बायोटेकची कोव्हॅक्सिन आणि रशियाच्या स्फुटनिक व्ही या लसींच्या आपत्कालीन वापराला मंजुरी देण्यात आली आहे. तसेच फायझर आणि जॉन्सन अँड जॉन्सनची सिंगल डोस लस मंजुरीच्या प्रतिक्षेत आहे. भारतात मोठ्या प्रमाणात लसीकरण मोहीम राबवली जात आहे.
आकडेवारीनुसार, एकूण लसीकरणांतर्गत ८८ टक्के कोव्हिशिल्डच्या लसी देण्यात आल्याचे सांगितले जात आहे. त्यामुळे युरोपीय संघाच्या देशांमध्ये जाणाऱ्या भारतीय प्रवशांसमोर प्रश्नचिन्ह उभे राहू शकते, असे म्हटले जात आहे.. युरोपीयन संघात सहभागी असलेल्या अनेक देशांनी डिजिटल व्हॅक्सिन पासपोर्ट जारी करण्यास सुरुवात केली आहे. या पासपोर्टमुळे संबंधित व्यक्ती करोनाचा प्रतिकार करण्यासाठी सक्षम असल्याचे प्रमाणित करेल, असे सांगितले जात आहे. युरोपीय देशांमध्ये कामासाठी, पर्यटनासाठी वा अन्य कारणांसाठी जाणाऱ्यांना डिजिटल व्हॅक्सिन पासपोर्ट आवश्यक ठरणार असल्याचे म्हटले जात आहे.
युरोपीय मेडिसिन एजन्सीने आतापर्यंत चार करोना लसींना मान्यता दिली आहे. यामध्ये फायझर, मॉर्डना, एस्ट्राजेनेका आणि जॉन्सन अँड जॉन्सनचा समावेश आहे. या चार लसींचे डोस घेतलेल्यांनाच युरोपीय संघांच्या देशांमध्ये प्रवेश मिळू शकेल, असे सांगितले जात आहे. एस्ट्राजेनेका या लसीचे संस्करण असलेल्या पुण्यातील सीरम इन्स्टिट्यूट तयार करत असलेल्या कोव्हिशिल्ड लसीला मात्र युरोपीय संघात मान्यता देण्यात आलेली नाही. युरोपीय संघात एस्ट्राजेनेकाचे संस्करण असलेल्या वॅक्स्झर्वरिया या लसीला मान्यता असून, ती ब्रिटनमध्ये तयार केली जाते.