महामार्गावरील अर्धवट कामामुळे अपघात

नशिब बलवत्तर म्हणून प्राण वाचले, वाहनाचे नुकसान

गुहागर, ता. 23 : शृंगारतळीकडून गुहागरकडे येणाऱ्या डंपर आणि चार चाकी यांचा पाटपन्हाळे येथील पुलावर अपघात झाला. पुलाचे काम अर्धवट असल्याने डंपरने वेग कमी केला. डंपर मागून येणाऱ्या भरधाव वाहनाला अचानक कार थांबवता आली नाही. हे वाहन डंपरच्या खाली घुसले. सुदैवाने या वाहनातील प्रवाशांना केवळ किरकोळ दुखापत झाली. मात्र या अपघातात चारचाकी वाहनाचे मोठे नुकसान झाले आहे. हा अपघात 22 नोव्हेंबरला सायंकाळी झाला.  A Dumper and a small vehicle coming from Sringartali to Guhagar met with an accident on the bridge at Patpanhale. The dumper slowed down as the bridge work was incomplete. The vehicle coming from behind the dumper could not stop the car suddenly. The vehicle rammed under the dumper. Fortunately, the passengers in the vehicle sustained only minor injuries. However, the vehicle was severely damaged in the accident. The accident happened on the evening of November 22nd. (Accident on Highway)

हा अपघात 22 नोव्हेंबरला सायंकाळी 3.45 च्या दरम्यान झाला. श्रृंगारतळीकडून गुहागरच्या दिशेने सुभानअल्ला ट्रान्सपोर्ट कंपनीचा डंपर येत होता. या डंपर मागे मुंबई विले पार्ले येथून गुहागर वरचापाट दुर्गादेवीवाडीमधील शांताराम जांगळी यांच्या घराकडे जाणारे चारचाकी होती. ही गाडी अभिजीत रमेश मुरमुरे चालवत होते. उतार असल्याने गाडी वेगात होती. पाटपन्हाळे पुलाजवळ डंपर चालकाने गाडीची गती कमी केली. रस्ता नवीन असलेल्या अभिजीतला चटकन गती कमी करणे जमले नाही. त्यामुळे सदर वाहन थेट डंपरच्या खाली गेले. ही धडक इतकी जोरदार होती की, डंपरचा मागचा भाग वाहन चेपत चालकापर्यंत आला. चार चाकीची पुढची काच तुटली. बॉनेटचा पत्रा कागदाप्रमाणे चुरगळा गेला. डंपरच्या मागील फाळक्याचा एक दांडा चारचाकीच्या पत्र्यात अडकला.

या चारचाकी वाहनात चालकासह 1 पुरुष व 2 महिला होत्या. सुदैवाने कोणालाही गंभीर दुखापत झाली नाही. समोर बसलेला चालक आणि पुरुष यांच्या डोक्याला किरकोळ माल लागला. अपघात झाल्याचे कळताच आजुबाजुच्या परिसरातील ग्रामस्थ तेथे जमा झाले. त्यांनी अडकलेली दोन्ही वाहने मोकळी केली. अपघात गंभीर असला तरी कोणालाच दुखापत झालेली नसल्याने सर्वांनी सुटकेचा श्र्वास सोडला.

या अपघातामुळे पुन्हा एकदा महामार्गाचे अर्धवट राहीलेले काम हा वादाचा विषय बनला आहे. गुहागर श्रृंगारतळी दरम्यान पाटपन्हाळे येथे महामार्गावरील पुलाचे बांधकाम झाले. मात्र सदर पुलाच्या दोन्ही बाजुचा रस्ता क्रॉक्रिटीकरणाने जोडलेला नाही. डांबरीकरणाने रस्ता आणि पुल समपातळीत आणलेला नाही. अर्धवट काम असूनही  काम चालु आहे असा माहिती फलक ठेकेदाराने लावलेला नाही. श्रृंगारतळीपासून गुहागरकडे येताना उतारावर क्रॉक्रिटीकरण झाले असल्याने नव्याने येणारे वाहनचालक रस्ता पूर्ण झाला असे गृहित धरतात. भरधाव वेगाने येताना अचानक पुलाजवळ क्रॉक्रिटचा रस्ता संपतो आणि गाडी नियंत्रीत करणे अवघड होते. याच परिस्थितीमुळे आजचा अपघात झाला.

रस्त्याच्या अपूर्ण कामांमुळे गुहागर ते उमरोली दरम्यान यापूर्वीही अनेक किरकोळ अपघात झाले आहेत. मात्र त्यापैकी कोणीच पोलीसांकडे तक्रार केलेली नाही. त्यामुळे रस्त्याच्या अर्धवट कामामुळे किती अपघात झाले यांची नोंद कोणालाच ठेवता आलेली नाही. या अपघातांवर पोलीस प्रशासन कसे नियंत्रण मिळवणार. ठेकेदाराला काम पूर्ण करण्याचा आग्रह कोणी करणार का, महामार्गावर मृत्यू होण्याची वाट संबंधित प्रशासकीय अधिकारी पहात आहेत का. असे प्रश्र्न वाहनचालकांमधुन उपस्थित होत आहेत.

रस्त्यांच्या कामामध्ये अपघातावर नियंत्रण मिळविणे हा विषय पोलीसांच्या अखत्यारीतील आहे. तर अर्धवट राहीलेले काम पूर्ण करुन घेण्याची जबाबदारी प्रातांची आहे. त्यामुळे पुढे येवून कोणीतरी या दोन प्रशासनावर गुन्हे दाखल केले पाहिजेत. कोकण विभागाचे इन्स्पेक्टर जनरल दोन दिवस रत्नागिरीच्या दौरावर आहेत. त्याच्यापर्यंत हा विषय पोचवला पाहिजे.
– माजी आमदार डॉ. विनय नातू, उत्तर रत्नागिरी जिल्हाध्यक्ष, भाजप

अपघातस्थळावरील दृष्ये दाखविणारा व्हिडिओ पहा.